EHEHA NI’AMONI’Ö BA FAHUHUOSA

Fefu niha samati ba khö Yesu Keriso, ba no latema mbuala sebua sibai ya’ia da’ö Geheha Ni’amoni’ö. Dozi niha si lö manema Ya’ia, ba tenga ono Lowalangi (Roma 8:14, 16). Börö Geheha Ni’amoni’ö andrö, te’asogö khöda wa’abölö (dunamis) ba wamaduhu’ö Yesu Keriso ba guli danö. Niha sanema Eheha Ni’amoni’ö ba ha sambalö ifaduhu’ö Yesu ba gera’era, ba wehede ba ba mbuabuania bongi ma’ökhö (Halöŵö 1:8).

Baero wa’abölö (dunamis) andrö, ba ibe’e khöda göi Eheha Ni’amoni’ö mbuala tanö bö’ö (karunia), dozi ita zamösana. Molo’ö Roma 12:6-8; Efeso 4; 2 Korindro 12:7-11, oya sibai mbuala Geheha Ni’amoni’ö ba niha samati. No faehufaehu mbuala-Nia andrö. Ba ibe’e ba niha da’ö börö me moguna ba gorahua zamati.

Ba gotalua mbuala Geheha andrö, ba so nifotöi buala ba wamahaö (Rm. 12:7; 1 Fet. 4:11) ba tobali göi samahaö (Ef. 4:11). Halöŵö ba wamahaö andre, ba tobali noro dödö ndra kubalo ma ira satua nituyu Lowalangi nifataro ba gotalua mbanua-Nia. Ya’ira zi tobali fandrita, satua niha Keriso, ba tanö bö’önia.

Ba wamaha’öra banua Zo’aya, ba tebai la’ositengagö Geheha Ni’amoni’ö. Tobali ira enoni börö Geheha Ni’amoni’ö, sanuyu ya’ira tobali samahaö. Börö da’ö, famaha’öra göi ba ha sambalö molo’ö famahaö Geheha Ni’amoni’ö.

Si ndruhunia, Eheha Ni’amoni’ö andrö, ba no “guru sebua” ndra enoni Lowalangi. Ifa’ema Yesu wa Eheha Ni’amoni’ö si so khöda zamahaö ba samasugi khöda hadia manö zi no iŵa’ö Yesu (Yoh 14:26). Aefa da’ö, Eheha Ni’amoni’ö göi zanuturu lala si ndruhu, ifa’ema li Yesu khöda ba ifolakhömi Yesu Keriso.

Ba wamahaö Geheha ya’ita, ba mufodanedane göi ba wa’owölö’ölöda ba wame’e tödö ena’ö tefahaö. Lö manö ifahaö ita Eheha Ni’amoni’ö na lö khöda fombaso Sura Ni’amoni’ö. Lö I’ila ifasugi ba dödöda zi no irai iŵa’ö Yesu Eheha, na lö irai tabaso mendrua manö na lö tatanö ba dödöda daroma li niŵa’ö Yesu. Eluahania, halöŵö Geheha Ni’amoni’ö andrö ba wamahaö ya’ita, ba lö itayaigö gera’erada. Ifasugi zi no tabaso, ifahaö ba wangalui eluaha ba ifofa’abölö ba wamalua. Lö sa’ae fama’ele’ö ni’amualagö-Nia moroi yaŵa, börö me fefu wamahaö si sökhi, ba no mufa’anö ba Zura Ni’amoni’ö. Börö zi manö, na ta’otöi zamati ma Niha Keriso, ba fandröndröu ita ba wombaso Sura Ni’amoni’ö, ba sökhi ua ta’angerönusi ba tafareso, hadia si ndruhu niha samati ita si so Eheha Ni’amoni’ö?

Ba wama’ema taroma li (huhuo sebua), ba moguna sibai wombaso, wangalui eluaha, fangandrö fa’abölö ba fa’atuatua soroi Geheha, ba famalua ya’ia, mendrua manö ba wama’ema. Andrö moguna sibai ginötö ba wombaso taroma li, mufa’anö ba dödö (persiapan), ena’ö na latuyu ita wama’ema taroma li (tiba-tiba), ba ha samasugi sa’ae Geheha Ni’amoni’ö ba dödöda hadia zinangea tafa’ema ba mbanua Zo’aya. Faudu ba da’ö, imane Faulo khöda, “Ombakha’ö daroma li, böi bulö’ögö, he baŵa, ba he tenga baŵa” (2 Timoteo 4:2).