HA SAMBUA BA KHÖ KERISO

Amadöniŵa salua ba gotalua zamati ba Galatia ya’ia da’ö fefu niha baero si tobali niha Keriso, lafarou ira niha Yehuda si no tobali Niha Keriso ena’ö lafalua fefu goroisa si mane famoto (sunat). Ba so göi ba dödöra wamaehusi ya’ira ba niha baero me ya’ira nga’ötö Gaberahamo, sanema amabu’ula li Lowalangi.

Me irongo da’ö Faulo, ba mofönu ia. Andrö ifa’ema khöra zura, ibe’e wangaboto ba dödö si mane nisura ba 3:26-29. Ifaduhu’ö Faulo wa fefu niha ba guli danö andre tola tobali ono Lowalangi, sanema amabu’ula li-Nia (26). Ena’ö tobali ita ono Lowalangi, imane Faulo “moroi ba wamati andrö khö Keriso Yesu.” Faudu göi da’ö ba nisura Yohane “khöra itehe, tobali ono Lowalangi ira, khö zamati ba döi-Nia andrö” (1:12). Fa’atobali ita ono Lowalangi tenga moroi ba nga’ötö ma zui molo’ö amakhoita. Ha sambua lala wa tobali ita ono khö Zo’aya, ya’ia da’ö famati khö Yesu Keriso.

Yesu andrö Ono Lowalangi si ha samösa. Dozi samati ba döi-Nia, ba tobali ono khö Nama göi ba zorugo. Famatida khö-Nia ya’ia da’ö faduhu dödöda wa Ya’ia andrö Ono Lowalangi nifatenge ba guli danö, si tobali Sangorifi ya’ita, same’e fa’auri si lö aetu khöda.

Itohugö göi Faulo wa famayagö idanö nitemada ba döi Keriso, ba no tobali tandra wa no ta’onukha Keriso ba wa’aurida. Famayagö idanö si ndruhunia, tandra wa no tana khö Keriso ita. Famayagö idanö lö tobali ndrela wangorifi ya’ita. Famayagö idanö zamaduhu’ö wa ya’ita no tobali sanema amabu’ula li Lowalangi ba khö Keriso Yesu.

Börö me famayagö idanö andre mufalua ia ba niha fefu (Yehuda-Heleni; sawuyu; ira matua ba ira alawe), tobali göi tandra wa ha sambua ita khö Zo’aya. Lö sa’ae amaehutada khö Lowalangi. Ya’ita ma’afefu si no mamati ba sanema famayagö idanö, ha sambalö wa sanema ondröita Lowalangi ita, ya’ia wa’auri si lö aetu. Lö ifaigi mbawa niha Yehowa, ba lö itöngöni mbosida. Ibe’e mbuala-Nia khöda, börö Yesu Keriso.

Si ndruhunia, börö wamati andrö wa tola tana khö Keriso ita. Imane Faulo, na no tana khö Keriso ita, ba no ma’uwu Gaberahamo ita. Na molo’ö gangosisila nga’ötö, ya’ita andre lö amakhaitada khö Gaberahamo. Ha ba döi Yesu Keriso zamakhai ya’ita khö Gaberahamo awö gamabu’ula li Lowalangi khönia. Amabu’ula li andrö ba no tefa’ele’ö ba khö Keriso, ya’ia wa’auri si lö aetu. Samuza tö, amabu’ula li andre mube’e ba niha samati khö Yesu. Börö zi manö, hadia no mamati ita khö-Nia?