WAÕWAÕ YESU KERISO SI LÕ NISURA BA ZURA NI’AMONI’Õ (BAGIAN I)

A  Famobörö 

 Nifotöi hikaya Yesu Keriso ba no oya zi no mufa’anö ba zura, he göi nifa’ema’ema ba dögi dalingada. Ba zi no mufa’ema ma nisura andrö, ba so ba gotalua zatulö, ba so göi zi lö atulö. Hana wa si manö? Börö me sanutunö ya’ia ba lö khönia fangosisi’ö si ndruhundruhu. Ba wama’anö waöwaö Yesu, ba ta’ondraligö zi no mufa’anö ba Zura Ni’amoni’ö ba tafahela göi ösa ba hikaya niha Yahudi/Iraono Gizera’eli.

No tobali anofula sebua ba sasese lafaehagö niha si lö mamati[1] ba he göi niha si no mamati ba döi Keriso,[2] waöwaö Zo’aya ya’ita Yesu Keriso si lö nisura ba Zura Ni’amoni’ö. Anofula ba waöwaönia andre tetandrösaigö ba hikayania ba ndröfi si 2 fakhe irugi zi 11 fakhe, ba ba ndröfi si 13 fakhe irugi zi 29 fakhe. Sanura sura duria somuso dödö (kitab Injil)[3] lafaduhu’ö wa lö nisurara fefu waöwaö Yesu andrö. Si no mufa’anö ba zura, ha waöwaö Yesu i’otarai tumbu irugi 2 fakhe (Luka 1-2; Mat. 1:18-25; 2:1-40), me möi ia ba Yeruzalema ba ndröfi si 12 fakhe (Luka 2:41-52), ba me ibörötaigö wamahaö ba ndröfi si 30 fakhe (Luka 3:23) irugi mate ia ba manahae ia ba zorugo.

Börö me lö nisura waöwaö Yesu andrö, ba oya zi tobali bua wangerangera si no mufaehagö ba gotalua niha si lö faduhu tödö khönia, ba he göi ba gotalua niha samati khö Yesu. So zanguma’ö wa ba waöwaö si lö nisura andrö, ba no ilau mofanö Yesu ba mbanua saröu, si mane ba India, ba Arab ba ba mbanua sebua tanö bö’ö. So göi zanguma’ö wa ba ginötö da’ö, no ifuli ia miyaẁa ba zorugo khö Namania. Tenga ha da’ö zi no lafaehagö, ba ato zanguma’ö wa labini’ö da’ö börö me so zi tebai lafatunö ba niha fefu hadia manö zi no ifalua Yesu. Si ndruhunia, fefu nifaehagö niha si faudu ba waöwaö Yesu si lö nisura andrö ba no nifodanedane ba wa lö la’ila hadia nilaunia ba ba wa lö faduhu dödöra khö Yesu Keriso. Börö zi manö, fanofu nifaehagöda ba zi manö ya’ia da’ö, hana wa lö lasura hikayania andrö fefu, irege lö fanofu si mane? Hadia zi tobali tahi ndra Matai’o, Mareko, Luka ba Yohane ma zui ira sinengenia tanö bö’ö wa lö labe’e ba zura waöwaö Yesu andrö? Ba hewisa lala ena’ö ta’ila waöwaönia ba zi lö nisura andrö? Hadia so gamakhaitania ba huku niha Yahudi? Fefu da’ö aboto ba dödöda dania na so khöda wagohisa wangerangera ba wangalui ya’ia ba zi no mufa’anö andre. (Bersambung)