Famobörö
Sanura sura andre, enoni Lowalangi so töi Hosea. Tefatenge ia ba wamangelama iraono Gizara’eli ena’ö tola mangawuli ira ba wa’aboto ba dödö si sökhi föna Lowalangi. Ifa’ema goroisa Lowalangi andre ba ginötö razo Usia, razo Yotamo, razo Ahasi, razo Hizikia ba ndraono mado Yuda ba razo Yerobeamo ba ndraono mado Geferayi (Hosea 1:1).
Lö tola lö ifalua wönu-Nia Lowalangi ba ngawalö horö nifalua ndraono Gizara’eli, ya’ia da’ö: ba wanömba adu ma Lowalangi bö’ö. Ba ifalua göi wa’omasi-Nia ba ibe’e wangefa ba niha si so fa’aboto ba dödö ba sangawuli khö-Nia.
Ösi
Ba zura Hosea 6:1-6, so 2 faosatö zi tobali angerönua:
Fama’ema ena’ö mangawuli ira ba wamosumange Lowalangi (Ayati 1-3)
Fefu zalua (famakao, fa’oriri dödö) alua da’ö börö me no la’erogö Lowalangira (Ay.1)
I’efa’ö Lowalangi mbanua-Nia ba ngawalö zi lö sökhi na so wangesa dödö, lö ara ginötö (Ay.2).
Fanou’ö föna Lowalangi fefu wa’auri, ba fa’aboto ba dödö ha niha niha föna-Nia, ba fangandrö howu-howu si lö tebulö ba si lö mamalö-malö (Ay.3).
Fama’ema Lowalangi ba Famareso dödö mbanua-Nia (Ayati 4-6)
He mado Geferayi ba he mado Yuda, ba oi i’ila Lowalangi wa ya’ira andre, si lö fa’aro dödö ba wamati. I’oduma-dumago wa’omasira si mane lawuo ba zi hulö wongi ba si mane namo mbanua, lö ara ba taya (Ay.4)
Börö wa’abe’e dödöra andrö, ba itehegö Lowalangi na so wa’oriri dödö ma famakao. Tenga börö wa lö omasi Ia mbanua-Nia, ena’ö so khöra wangesa dödö (Ay.5).
Famosumange Lowalangi da’ö sa zomasi Ia, tenga börö zumange nitunu (Ay.6)
Ba gangerönua andre, ifarou dödöda:
Famalalini era-era, tenga ha fangoroma’ö ba zikhala. Eluahania: tenga ha ba ginötö so gabula dödö, tenga ha ba ginötö tosasa, tenga ha ba ginötö so wamakao awena ta’alui zokhö ya’ita ba wanolo ma ba wa me dalu-daluda. Ta’oroma’ö ia ba wa lö faröi he na so wa'omuso dödö ba he na so wa’abu dödö. Tandra wa lö faröi ita khönia: möi ita ba wangondrasi ya’ia ero inötö, he ba Migu, he ba PA ba he ba gangowuloa niha samati, he na maoso ita bahe na mörö ita lö olifu ba wanou’ö fa’auri andre tanö föna Lowalangi.
Lö’omasi Lowalangi na so waminisa tödö zamati khö-Nia. Eluahania: Fangosambua’ö lala wamati ba wanuno ba wamosumange Ya’ia ba fa’aboto ba dödö wa lö fangorifida ba danö bö’ö baero Ia; da’ö lala zumange sabölö omasi Lowalangi. Duma-duma zamalua si lö sökhi (so horö), na so waminisa tödö ba famosumange Lowalangi bö’ö ba lala wa’auri zamati.
Famatöfa
Ba ginötö andre, oya sibai wondrönisi dödöda ena’ö tola faröi ita khö zokhö ya’ita. Oya wondröni dödöda ena’ö lö ta’ondasi Ia. Tola mano: Halöwöda, Soroiyomoda, Okhötada ba tanö bö’önia iba’agö ita ba wangondrasi Lowalangi. Tola manö göi abula dödö sebua, idönisi ita ba wangalui lala bö’ö ma fangorifi tanö bö’ö. Na hulö zi lö ba dödö Lowalangi ita, ba asese ita hulö ndraono si fabalö: Lö möi ita mangandrö khö-Nia, lö möi ita ba gosali, lö möi ita ba PA, lö möi ita khö ndra enoni Zo’aya. Asese ta’alui lala si tola mamolala tödöda tenga sa’ae khö Lowalangi.
Na so gakaola dödöda, asese ita fatahi ba lö fanema’ö. Famareso dödöda ya’ita banua-Nia na so gabula dödö, böi möi ita ba mbö’ö ta'ondrasi zangorifi ya’ita, me no iwa’ö: Mi’alui Yehowa fatua i’oro’ö ia, mi’angaröfili ia, fatua ahatö Ia (Yesaya 55:6). Oya zalua sahöli-höli dödöda ba ginötö andre, ba na’ambö ita ba wanou’ö tanöföna-Nia, ba tola manö te’ala ita. Börö da’ö, böi ata’u ba böi mangiwa dödöda, börö me so Yesu si fao khöda bongi ba ma’ökhö, me no göi iwa’ö: lö uröi ami hulö zi lö ama si lö ina, möido khömi.
Ba daroma li-Nia andre: ifasugi ba dödö zamati he khöu, he khögu ba hekhöda ma’afefu, wa no omasi’ö-Nia ita andre. Omasi Ia na tabe'e wa’aurida andre ma’asambua talulu ba wamosumange ya’ia, lö mamalö ita ba wamati saro tanöföna khö-Nia, datalului wohalöwö ba nowi Zo’aya, he ya’ita enoni ba he ya’ita fefu banua Niha Keriso datafalua zomasi Lowalangi, damohalöwö ita ba mbasitö-Nia gasa-gasa wekolida ba guli danö andre. Datafuli ita khö Lowalangi, databohouni wa’aurida, tabohouni gamuatada, ba era-era dödöda ena’ö tola tobali sumange si sökhi tanöföna Zo’aya, ba ya sanema howu-howu ita sandrohu fa’aurida. Ya’itolo ita Lowalangi. Yaduhu.