Yohane 12 : 12-19
12 Sara wongi aefa da’õ, me larongo, niha sato, si no mõi ba gowasa, no mõi ba Yeruzalema Yesu, 13 ba lahalõ mbulu nohi, mõi ira mamaondragõ ya’ia, mu’ao ira: Hosana, ya’ahowu zi so andrõ, ba dõi Zo’aya, razo Ndraono Gizeraëli andrõ!
14 Ba me isõndra nono galide Yesu, ba i’okudo, itõrõ zi so ba zura andrõ: 15 ”Bõi ata’ufi, ono Ziona alawe, hiza, so razomõ, i’okudo nono galide”. 16 Lõ’õ sa i’anema’õ aboto ba dõdõ ndra nifahaõ da’õ ba me no tefolakhõmi Yesu, awena itõrõ tõdõra, wa ba khõnia tesura da’õ, awõ wa no lamanõ khõnia. 17 Ba lafaduhu’õ niha sato, si fao khõnia, wa no humede ia khõ Lazaro andrõ ba lewatõ, wa no isusugi ba ngai zi mate. 18 Andrõ gõi la’ondrasi ia niha sato, me no larongo, no ifazõkhi dandra andrõ. 19 Ba faoma lamane farizaio khõ nawõra: Mi’ila, lõ’õ manõ fakhai wolaumi. Hiza, ahori manõ la’o’õ niha ba guli danõ.
Famobörö
Ba wa’aurida sero ma’ökhö, omasi ita na fahuwu ba niha si tehöngö, ba niha sokhö ma khö ndra amada sondrönia’ö si mane Bupati, Gubernur, Menteri mendrua manö na amada Presiden. Oya lala nitörö afu tola fa’ila ita ba khöra. Hana? Motöi ita ma’ifu na fariawö ba khöra mendrua manö na so gohitö dödöda zamösana ba khöra.
Ösi
Me luo no, me Ifobörö lala halöŵö-Nia Yesu Keriso ba gulidanö, ba oya Ifalua zahölöhöli dödö, si mane Ifadöhö zofökhö, Isusugi zi no mate (Lazaro), ba tanö bö’önia. Ba tehöngö döi-Nia Yöu Raya, Aekhula Atumbukha ba ato niha somasi falukha khö-Nia, ba oi omuso dödö niha sato ba wa’atohare-Nia andrö (Ayati 12-13).
Me möi Yesu ba Yeruzalema, ato niha Yehuda si fahulö falukha khö-Nia. Fanötöna dödöra wa ha sambalö Ifalua zahölihöli dödö si mane me so Ia ba mbanua Mbetania. Latema’ö Ia si fao fa’omuso dödö, ba lahalõ mbulu nohi (Daun Palem), mõi ira mamaondragõ Ya’ia, mu’ao ira, Lamane, “Hosana, Ya’ahowu zi so andrõ, ba dõi Zo’aya, razo Ndraono Gizeraëli andrõ!” (ayati 13).
Si manö göi ndra nifahaö Yesu, omuso göi dödöra, ba motöi göi ira me ya’ira andrö si fahatö khö Yesu. Sindruhunia, ambö aboto ba dödöra hadia ia gohitö dödö Yesu we’amö-Nia ba gulidanö. Andrö wa I’okudo Galide andrö Yesu si tobali tandra wa Ya’ia Razo Solakhomi, Razo Zorugo ba Razo Gulidanö Ia (ayati 14-15).
Ba gotalua wa’omuso dödö niha sato me luo da’ö, ba so göi ba da’ö niha Warizai’o, sangila he’iwisa niha sato wamaondragö Yesu andrö. Hadia Zalua khöra? Alua khöra wa’afökhö dödö, oyo wisora me lö ba dödö niha ira sa’e (ayati 19 ba fahea Luka 19:39). Fe’asora ba da’ö no amaedola zingo sindröndröndröndrö, i’alu’alui ha niha ni’ania. Andrö la’alui lala wama’ala-Nia.
Si tobali angerönua khöda, ya’ia :
- Siföföna, ya sindruhu ta’oigö dödöda ba wamati ba khö Yesu, tenga börö me oya zahölö dödö nifalua Yesu, andrö wamamati ita khö-Nia. Böi ya si mane famati Wara’o wamatida, famati ba zi hasabata. Me oya gabula dödö ma oya gangandröŵa, ba awena tabalöduhi tou danö ta’angaröfi li Yehowa, ba talau manunö : ba Röfa Yesu so so dödögö 3x, Tebai uröi tebai uröi. Na baŵa wa’omuso dödö, ifataria salua khöda “ya’o ba ya’ugö”. Hiza ine, ya si mane famati Dani’eli ita, Dawido, Faulo, he oya wamakao awö wanandraigö ba lö tebulö ira khö Yehowa. Andrö imane khöda Yesu, “Na so zedõna molo’õ Ya’o, ba yamu’ositengagõ ia ba yamulu’i rõfania ba yamu’o’õ Ndra’o.” (Mat. 16:24).
- Si dua, moguna tahalö khöda wa’ahono dödö ba wanema’ö Keriso andrö. Ya’ia andrö no Razoda sangorifi ya’ita. Andrö ta’andrö saohagolo ba wa’omasi-Nia ba khöda zamösana. Böi si mane Farizai’o ita, me so khöra wanahö tödö awö wa’afökhö dödö.
- Si tölu, Ya so khöda wama’anö tödö si fao famati föna Yehowa Lowalangi, ta’agö haga, dumaduma ba asio ba zi fasui ya’ita. Data’oroma’ö mbuabua wa’aniha Kerisoda. Mendrua manö ya’ita ira enoni, ya si ndruhundruhu so khöda dödö wa’a’enoni, na no tödö wa’a’enoni zi so khöda ba nifaluada ba wangombakha turia fangorifi, ba wangefa, ba turia wa’ohahau dödö.
Amarahuta
Andrö ba gangerönua khöda ma’ökho andre, Ya sindruhundruhu ta’oigö dödada zamösana ba wamati khö Yesu Keriso andrö. Aine, datatema’ö Ia. Yamutolo ita So’aya. Yaduhu.