Famobõrõ
Ba ngaluo ma’ökhö itörö tödöda ngaluo wabalisa Gosali AFY moroi ba Zending me 18 Agustus 1933. Si lalö. Fabalisa AFY andrö zamaduhu’ö khöda wa ya’ita si ndruhunia, no so wa’aro wamati, tedou ba wanötöna ba mowua ba khö Lowalangi. Si faudu ba daroma li ma’ökhö andre, ba ifarou ita göi banua Niha Keriso ena’ö ta’o’ö huku ba tafalua zatulö. Töratöra ita ba nöri Gosali AFY, ta’onorogö tödö daroma li andre, ena’ö so gamaehutada si ndruhundruhu moroi ba niha fefu, tandra wa niha samati ita khö Yesu Keriso.
Famotokhi
Fama’ele’ö Yesaya andre ifa’ema ba Ndraono Gizeraeli sowö’ölö’ölö sibai mamalua fasumangeta khö Lowalangi. Ero’ero si hulö wongi faoma tanö owi, ba lafaosa zumange khö Yehowa. Ero inötö, ba la’ohe game’ela ba nomo Lowalangi. Hiza, niha solaulau da’ö itegu ira Yesaya börö me no la’olifugö zi ndruhu goroisa Yehowa khöra. Imane Lowalangi “Folau satulö ba sadölö zomasi Yehowa, moroi ba zumange nitaba” (Amaedola 21:3). Lö ba dödöra zi numana, lakha mbanua, iraono si lö satua. Owuawua dödöra föna Zo’aya, ba taya ba dödöra wa’omasi ba fa’atulö ba niha si fasui. Ba wama’ele’önia andre, ifa’ema khöda Yesaya 3 (tölu) faosatö lala gangerönua, ya’ia da’ö:
1. Fa’auri zamati mufodanedane ia ba wolo’ö awö ba wamalua nifakhoi Zo’aya (ay. 1-2)
Taromali Lowalangi, tefa’ema si fao goi-goi satulõ ba sabe’e: “Mitõrõ lala ba milaoe zatulõ”, goi-goi da’e tenga ha famarou dõdõ, ba hiza no fehede Lowalangi. Folo’õ huku Lowalangi, eluahania fa’auri si faudu ba zomasi Lowalangi, tenga molo’õ somasi guli danõ. Ba migu Trinitas andre, iforoma’õ khõda wa:
· Lowalangi Ama, ibe’e huku bõrõ wa’omasi-Nia khõda ya’ita ni’orifi-Nia,
· Yesu Keriso, ba no ifalua huku andrõ, ba wa’auri-Nia me mõi Ia ba guli danõ, irugi wa’amate-Nia,
· Eheha Ni’amoni’õ, I’abõlõ’õ ita ba wolo’õ, ba wamalua si faudu ba zomasi Lowalangi.
Ba waöwaö AFY me ndrõfi 1933, ira sondrõnia’õ, ba mbanua niha keriso, abõlõ la’osia’aigõ wolo’õ fogaoni Lowalangi, tenga ha modane-dane ba wamatõrõ ma ba goi-goi ndra sanuriaigõ huku Lowalangi (misi luar).
Ya’ita niha Keriso ma’ökhö, tekaoni ita göi ba wolo’ö, ba wangai halöŵö Lowalangi, ba wondrorogö okhöta ma be’elö danga mbanua Niha Keriso, ba halõŵõ fondrönia’ö, ba lala wa’auri si’ero ma’ökhö si faudu ba zomasi Lowalangi.
2. Fa’atulö Lowalangi Irugi Niha Fefu, (ay. 3-7)
Ifa’ema khöda Yesaya wa fangorifi ba howu-howu Lowalangi, tenga ha ba zi samösa ba hiza ba niha fefu sowanua ba guli danö. Famatörö, ba fa’atulö Lowalangi, modane-dane moroi ba wa’omasi, wogaoni si no elungu, lö ifaehusi ita no fagölö-gölö ita föna Lowalangi, lö fabö’ö dödö-Nia khöda.
Ba da’a oroma khöda hewisa wa’omasi Lowalangi Ama, Yesu Keriso, ba Eheha Ni’amoni’ö, (Tritunggal) ya’ia da’ö:
· Lowalangi Ama, iwõwõi niha guli danö,
· Yesu Keriso, ihöli fefu niha guli danö moroi ba huku horö,
· Eheha ni’amoni’ö, mohalöŵö ba wa mofa’auri ba wa’auri zamati daroma li Lowalangi.
Fa’auri zamati, bõi arõrõ ba wa’aurinia zamõsana. Tekaoni ita fefu ena’ö tobali ndrela howu-howu ba niha fefu (ay.7)
Fa’alua wabalisa moroi ba Zending ba ginötö si no tatalu’i, tefahaö ita fefu wa fa’auri zamati ba ginötö da’ö no te’aro’ö ba wogaoni ba khö Lowalangi. Gereja Angowuloa Fa’awösa Khö Yesu (AFY), tekaoni göi ba halöŵö khö Lowalangi, ba moguna ita göi ba niha fefu. Börö zi manö hadia no tabokai wa’aurida ba wanema’õ ba ba wangomasi’õ niha bõ’õ? Hadia no tafalua zadõlõ ba satulõ ba nawõda niha gõi? Hadia no tobali ita gõi ndrela howu-howu ba niha bõ’õ, gofu ha niha ira?
3. Halõŵõda ba wangaro’õ ba ba wamalua fa’atulõ ba guli danõ (ay. 1 & 8)
Fa’atulõ tenga ha ba li si lõ oroma, ba hiza tefa’ele’õ ba gamuata si’ero ma’õkhõ. Lowalangi ikaoni ita ba:
· Wanolo sitebai,
· Wanimbagõ fa lõ atulõ,
· Ba ena’õ fa’aurida tobali atulõ ba gotalua niha ba guli danõ.
Lowalangi nisunoda ba no Lowalangi sangosambua’õ, sangabõlõ’õ, ba sangorifi (ay. 8), ya’ita tekaoni tobali sangai halõŵö-Nia.
Ba hikaya wa’amusindro Gereja Angowuloa Fa’awösa Khö Yesu (AFY), tenga ha ba wamalua fangosambua’õ ba lala halõŵõ, no ba wangosambua’ö ba wangaro’õ ba ba wondrou’õ satulõ si faudu ba zomasi Lowalangi.
Ba da’e ifahaö ya’ita samati, enaö tobali ita duma-duma tanö föna ba wangombakha ba ba wamalua satulö, fo’amuata si sökhi he göi ba wangai halöŵö Zo’aya, ya tobali ita duma-duma si sökhi ba wamalua fa’omasi si fao fa’atulö börö Lowalangi.
Fondruhõ
Taromali Lowalangi ma’ökhö andre, ifarou dödöda, ena’ö:
1. Ta’o’ö huku Lowalangi,
2. Tafalua wa’atulö,
3. Tafalua wa’omasi ba niha fefu
4. Tafalua halöwö lowalangi moroi si’ai ba dõdõ.
Ba wanörö tödöda fa’alua me 18 Agustus 1933 – 18 Agustus 2026, tefasugi khöda wa Gereja AFY, musindro/te’asogö börö moroi ba wamati, fa lö fa’ata’u, ba folo’ö. Da tatohugö ba tadou’ö halöŵö si sökhi andrö ba wamolakhömi Lowalangi.