Famobörö
Na tahaogö ta’angeraigö, si ndruhunia hadia geluaha wanahae Yesu andrö ba wa’aurida? Si ndruhunia, fanahae Yesu andre zo’amböta ta’anorogö tödö. Lö tafalua lala halöŵö sebua (acara besar) ero manahae Yesu. Hulö zi lö eluaha ia khöda. Molo’ö taroma li, fanahae Yesu andrö ifa’ele’ö khöda fefu sowanua ba guli danö wa Yesu andrö te’a’aro’ö ia ba dadaoma wa’arazo: Razo yaŵa razo ba ba lalu’a gaheNia so sa’ae zi fa’udu khöNia.
Famotokhi
Sanandrösa ba nisura Luka andre, so 3 (tölu) faosatö zedöna ta’angerönusi. Ena’ö aoha khöda wangosisi’ö ya’ia, ba u’adogoi ia wanguma’ö AWÖMA: AWAI, MOHALÖŴÖ, MOMBALOI. Si föföna, AWAI: Manahae Yesu ba zorugo börö me no awai halöŵö-Nia. Ifa’ema Luka khö Teofilo he göi khöda irugi ma’ökhö, wa ba Duria Somuso Dödö (Injil Lukas) no awai sa’ae halöŵö Yesu, irege maoso Ia ba lewatö. Ba zi 40 wongi wefaofaora, Ifahaö ndra nifahaö-Nia ba zi no Ifalua: no Ihöli niha, no Ibokai mba’aba’a khöda. Ifaduhu’ö da’ö ba röfa, me mu’ao Ia, imane “No awai” (Yoh. 19:30). Hiza, me no sa’ae awai da’ö, ba Ifuli möi Ia ba zorugo, mudadao Ia ba dadaoma solakhömi, nahia zi möna, ba gambölö Lowalangi Ama. Ba da’ö ifahaö ita Luka ena’ö omuso dödöda me no sa’ae ihalöŵögöigö Yesu fefu zomasi Nama, si tebai tafalua ba zanandrösa ba wohöli ya’ita ba horö. Aefa da’ö, ifahaö göi ita ena’ö ta’onorogö tödö sa’ae halöŵö Yesu, tatema’ö ia ba wamati. Dumaduma khöda göi nifalua-Nia andre, ena’ö böi taröi lala halöŵöda fatua lö awai. Dozi sanau ölö ba sangodödögö halöŵönia, ha da’ö zanema luo.
Si dua, MOHALÖŴÖ: Manahae Yesu ba zorugo börö me no Ibe’e ba dangada wanohugö halöŵö-Nia. Si no awai ihalöŵögöigö Yesu, ya’ia da’ö famodanedane lala wangorifi; no awai sa’ae ifazökhi wondrasi, ba ibe’e göi ba dangada sa’ae wango’ozui wamesindro ba ba wangotomosi si no ifalua. Itou’ö halöŵö andrö khöda börö wa’ahakhö dödö-Nia (kasih karunia), si mane niŵa’ö Waulo ba zura 2 Korindro 4:1 “nifataro ndra’aga ba halöŵö andrö, dali wa’ahakhö dödö andrö, si no falukha ndra’aga.”
Lala halöŵöda ya’ia da’ö ba wamaduhu’ö Ya’ia ba zi sagörö uli danö (8). Ena’ö böi so wa’aombö dödöda, ba Ifabu’u khöda wa so dania wa’abölö (dumanis) nibe’e khöda soroi Geheha Ni’amoni’ö. Ba da’ö Ifaduhu’ö Yesu Keriso andre wa samaduhu’ö Ya’ia khöda ya’ia Geheha Ni’amoni’ö si mane nisura ba Yohane 14:26; 15:26; 16:14. Eheha Ni’amoni’ö zamahaö ba samotokhi ba dödöda hadia zi no ifalua Yesu. Fefu nifa’ema-Nia khöda, ba no mufa’anö ba Zura Ni’amoni’ö. Börö zi manö, ba wamaduhu’öda Yesu Keriso, ena’ö so khöda wa’aboto ba dödö awö wa anehe ita ha niha nifaduhu’öda. Ya’ita samaduhu’ö (saksi; martus), sangila, saboto ba dödö ba si lö aiwö wamaduhu’ö si ndruhu. Me samaduhu’ö Yesu ita, ba ha sambalö ta’ila sa’ae heza i’otarai, heza tumbu, hadia halöŵö-Nia, ha niha zamunu Ya’ia, heza mate Ia, hadia geluaha wanahae-Nia, ba hadia göi goroisa-Nia khöda irugi ma’ökhö.
Ba wamaduhu’öda Yesu andre, itegu ita na oya wangi’ila ba zanandrösa ba mbuabua nawöda. Böi ta’ila gosilöŵa nawöda niha moroi ba hikaya wa’auri Yesu Keriso. Ta’onorogö tödö ena’ö böi fabö’ö Yesu nifaduhu’ö Zura Ni’amoni’ö, ba nifaduhu’öda ba wa’auri andre. Na no tobali ösi dödöda Yesu andrö, ba lö fulitö wa tobali göi Ia turia mbeweda heza manö so ita.
Si tölu, MOMBALOI: Manahae Yesu ba zorugo börö me Ifuli tohare Ia dania. Ba Zura Ni’amoni’ö ifa’ema khöda wa dua kali möi Yesu ba guli danö. Fe’amöi-Nia si föföna ya’ia ba zanandrösa ba wangorifi ya’ita. Ba zi mendrua dania, ya’ia ba wanguhuku ösi guli danö ma’afefu. Ba ayati si 11 andre, itegu ndra nifahaö si no atöngö fanahae Yesu. Fanegu da’ö ena’ö böi arörö ira wanöngönöngö talu mbanua ma lawuo sanema’ö Yesu. Hiza’i, ifabu’u khöda wa ha sambalö tohare zui Ia dania ba ginötö si no Ihonogöi Ama. Börö da’ö, tabaloi ginötö da’ö ba tahalöŵögöigö sa’ae zi no i’oroi’ö khöda wamalua. Tafowua sa’ae wa’omasi-Nia khöda irege we’asoNia andrö, me oi dozi ita andre dania isugi mbua si no tafalua ba döi-Nia.
Amarahuta
Ba wanahae Yesu andre, omuso dödöda me no möna Razoda ba wangefa’ö ya’ita ba huku horö andrö, ba no möi Ia göi ba nahia ni’amoni’ö si fao boto si bohou, ba wangandrö salahida föna Lowalangi Ama. Tafaduhu’ö Ia ba niha fefu, me fa’abölöda ba no soroi Geheha Ni’amoni’ö, ba sanema luo ita dania göi na lö khöda fa’awuwu ba ni’oroi’ö-Nia khöda. Ya itolo ita Lowalangi. Soli Deo Gloria! [My Lawolo]