Famobörö
Sambua nifa’ema Pdt. Stephen Tong ba ginötö si so ya’ita andre, imane fökhö sabölöbölö (krisis) ba ginötö andre ya’ia da’ö krisis cinta kasih. Fefu nifalua niha guli danö mufodanedane ia ba gohitö dödö ba hare (benefit). Lualuania, lö sanörö satulö, oi falimosa ba fa’afaito zalua. Hiza, ba nisura Waulo andre, ifa’ema khöda ena’ö ta’okhögö wa’omasi si sökhi, sangomusoi’ö tödö ba sangabölö’ö niha si fasui ya’ita. Hewisa ia wa’omasi si manö?
Famotokhi
Si föföna, Fa’omasi si tumbu ba wahuwusa si ndruhu khö Yesu Keriso (Kasih yang bertumbuh dari hubungan yang benar dengan Kristus). Ba ayati 4-5, ifa’ema Faulo wangandrö saoha gölönia. Molo’ö template zura Hellenis, fangandrö saoha gölö andre mufa’ema ia aefa wangowai (1-3). Ösi nifa’ema Waulo ba wangandrönia saoha gölö ya’ia da’ö börö wamati Wilemo khö Yesu Keriso ba fa’omasinia ba niha samati.
Famati khö Yesu zi tobali danedane si ndruhu ba wamalua fa’omasi. Ba wamati andre aboto ba dödöda hewisa wa’omasi Lowalangi khöda si no oföna mangomasi’ö ya’ita. Ba börö göi wamati dania wa tafaduhu’ö wa’omasi Lowalangi andrö ba niha guli danö. Ena’ö sökhi wa’omasida ba ha khö Yesu tafalemba wamatida, böi ba gana’a ma zui ba danö bö’ö. Na fahuwu ita khö Yesu, ba tafalua mbuabua somasi Yesu. Si tobali anofula khöda iada’e, ya’ia da’ö hadia fahuwu ita khö Yesu?
Si dua, Fa’omasi si tobali ndrela howuhowu ba niha fefu. Itohugö Faulo wo’angandröi Filemo ena’ö so guna (dampak) wa’omasinia andrö ba gorahua zamati. Fa’omasi tenga ha nidunödunö manö. Fa’omasi si ndruhu göi, ifalua ba mbuabua. Ohitö Waulo ena’ö terorogö manö wa’omasi si sökhi ba dödö Wilemo ba ifaduhu’ö da’ö ba zamati fefu.
Ya’ita samati göi ba ginötö andre, hadia no irai ta’angandröi nawöda ena’ö tedou ia wamalua fa’omasi? Hadia no irai ta’angandrö wo’omoda? Iraonoda? Fandrita? Böi mamalömalö ta’angandröi nawöda, ena’ö tobali ita ndrela howuhowu ba niha fefu.
Si tölu, Fa’omasi zanga’asogö fondrara dödö ba sangokafui tödö (7). Ba ginötö andre, omasi sibai niha na muhede ia, ba omasi ia lafondrondrongo. Mendrua manö ba lala wamati safökhö sibai, omasi sibai ita na so zame’e khöda bua gera’era ba sanuturu lala si tobali fondrara dödö ba sangokafui tödö saukhu. Börö zi manö, sökhi ta’angerönusi hadia no tobali ndra’o ndrela howuhowu Lowalangi ba niha? Hadia no anehe sibai ndrao wetarogu ba gotalua zamati? Hadia möi fangokafu ma sanga’asogö fasosota?
Amarahuta
Ya’ita samati khö Keriso, böi mamalömalö ita wamalua fa’omasi. Lowalangi no ibe’e khöda wa’omasi si sökhi, ba böi ta’okhögö manö da’ö, tafaduhu’ö ia ba niha fefu. Ya tobali ita ndrela howuhowu-Nia, ba wamolakhömi Ya’ia, ba wamati ba döi Yesu Keriso. Ya itolo ita Lowalangi – Soli Deo Gloria! [Pdt. Mey Daman Lawolo]