A. Famobörö
Ama/Ina/Talifusö, Ni'omasi'ö,
Oya ngawalö wamakao, fa'afökhö, ba fa'amarase nitöröda ba guli danö andre. He ba mboto, ba wangera-ngera, ba ba wamati. Asese so ita ba nahia wa'a basaki, irege asese manofu-nofu dödöda, *Hana wa lö falukhado fa'ebua dödö Lowalangi?*
Andrö moroi ba daroma Li ba zima'ökhö andre, ifasugi ba dödöda, wa lö irai iröi dozi sanötöna khö-Nia,
fa'ebua dödö Lowalangi.
*B. Famotokhi*
Ba zura Roma 8:26-30 andre, ifasugi khöda niha samati ba ginötö da'a, wa ba ngawalö hadia, itolo ita Lowalangi. Böi abu dödömi, niha samati, banua Lowalangi, nituyu-Nia
Me lö irai itehegö mowawaö samösa ita ba lala wekoli ba gulidanö. *Hana wa tola simanö?*
Tölu faosatö wangaboto ba dödöda:
*1. Eheha Ni'amoni'ö zanolo ba wa'amarase ba sangandrö salahida* (Ayati 26-27)
_"Ba si manõ gõi Geheha, itolo ita, me no ambõ waʼabõlõda. Hadia niʼandrõda enaʼõ, he wisa zi sõchi, ba lõʼõ sa taʼila; ba jaʼia, Eheha andrõ, iʼiagõ salahida, ba wangarõngarõ si lõ aloea baeha. Ba sanechegõ tõdõ andrõ, ba iʼila hadia niw̃aʼõ Geheha, me no iʼoʼõ zomasi Lowalangi weʼamõi salahi niha niʼamoniʼõ."_
I'ila Waulo, wa no sambö fa'abölö niha ba guli danö. Lö la'ila hadia nilaura, lö la'ila heso möi ira. Ba ba da'ö mohalöwö Geheha Lowalangi ba wanolo ita. Fanolo-Nia, fao ia ba wolu'i gabula dödö ba famakao andrö, i'onoro, ltehe marase ita.
Andrö, böi ta'osabölö ita ba wamakao ba ba wanandraigö salua ba wa'aurida, ae khö Yehowa, anötöna khö-Nia.
*2. Yehowa Zamatörö Fefu hadia ia, Saekhu ba zi Sökhi* (Ayati 28)
_"Ba no taʼila, ba zangomasiʼõ Lowalangi, ba oi ba zi sõchi manõ loealoea hadia ia, fefoe, ba chõra si no moekaoni, nihonogõi ba daʼõ."_
Iwa'ö ba zura Yeremia
_" Oeʼila sa, he wisa dõdõgoe chõmi — iw̃aʼõ Jehowa — tõdõ ba wangorifi ba tenga ba wamakiko, ba wamaigi faʼohahaoe dõdõ chõmi, ba gõtõ dania!"_
Ifatörö mbanua-Nia Lowalangi, ni'omasi'ö-Nia, ba nituyu-Nia. Ba ya'ira andre, banua samati sangomasi'ö Lowalangi. Fefu zalua khöda oi sökhi. He wa'ae fa'abu dödö, ma zui _"kegagalan"._ moguna ba wangatarö'ö wamatida ba khö Lowalangi. Amatöröwa Lowalangi ba wa'aurida, lö ta'ila. Awai'i, na Lowalangi zamatörö, ba lua-luania saekhu ba zi sökhi. O'ö gofu hewisa ia wamatörö Lowalangi wa'aurida.
*3. Ndroto-ndroto wa'ebua dödö Lowalangi ba niha samati*(Ayati 29-30)
_" Si no iʼila fõna sa, daʼõ gõi nihonogõinia, enaʼõ famaedo Nononia ira dania, enaʼõ si aʼa ia, ba no ato dalifoesõ. Ba ha niha zi no ihonogõi, daʼõ gõi nikaoninia, ba ha niha nikaoninia, daʼõ gõi zatoelõ, iw̃aʼõ, ba ha niha zatoelõ, iw̃aʼõ, daʼõ gõi nifolachõminia."_
No i'ohe wa'auri ba mbanua-Nia Lowalangi, ba mbanua ni'omasi'ö-Nia andrö.
- Ituyu i'otarai me mböröta *_(Foreknew)_*
- Ihonogöi, tobali famaedo Nono-Nia *_(Predestined)_*
- Ikaoni samati moroi ba daroma Li *_(Called)_*
- I'atulö'ö Börö wamati ba khö Keriso *_(Justified)_*
- Ifolakhömi ba mbanua-Nia dania *_(Glorified)_*
C. Amarahuta
Meno aboto ba dödöda wa'ebua dödö Lowalangi khöda Niha samati, ba böi ta'olifugö ba wangandrö saohagölö ba zi no ifalua. No i'orifi ita, he ba ginötö da'e, ba he göi ba ginötö dania. Tenga börö wa'abölöda wa'auri ita. Ba tenga göi börö wa'abölöda wa tobali ita banua-Nia. Fefu da'ö, no fa'ebua dödö Lowalangi khöda. Andrö, böi mamalö ba wanötöna Kho-Nia
Böi ta busi dödö ba ngawalö nitöröda ba guli danö andre. Me tenga börö wolohi ösi guli danö awena ohahau dödöda. Noro dödömö, be noro Yehowa.
Meno tobali ita banua-Nia, ba da ta bali'ö famaedoda Yesu ba lala wamati ba khö Lowalangi.